Wat is ‘n vakansie sonder ‘n lekker boek of sommer ‘n hele stapel?
Maak seker jy kry 5 Desember se Huisgenoot onder oë. Boekredakteur Elna van der Merwe het my en 23 ander Afrikaanse skrywers gevra om ons gunsteling Afrikaanse en Engelse boeke te deel.
Sy verskaf ook inligting oor een van ons eie boeke vir die kerskous.
Lekker lees en inkopies doen!
Siembamba ek lees sing-sing self-boekpak
Dit is nou moontlik om sing-sing te leer lees. Ja, regtig. Sing-sing.
Die idee vir die nuutste boekpak in my ‘Ek lees self-reeks’ het in my gr. 3-klas ontstaan.
Ek het agtergekom ‘n paar leerders met leesprobleme haal graag my liedjieleêr uit die rak. Dan is daar beurte gemaak om met die wysvingertjie al op die woorde te sing.
Uiteindelik kliek Juffrou. Hierdie kinders beleef die heel eerste keer die vreugde van vlot en boonop stresvrye lees, want die liedjie ‘dra’ hulle.
Ná hierdie ontdekking het ons plesierige lees met ander tekssoorte ook probeer. Om glimlagte op gesiggies te sien wat net altyd onseker oor ‘n leesboek buk, is iets wat ek altyd sal koester.
‘Siembamba ek lees sing-sing self’ bevat 5 boekies met:
-volksliedjies en immergroen rympies
-tergrympies en tongknopers
-gebedjies en slaapliedjies en -rympies
-lekker lawwe sêgoed en rympies
-en effens langer gediggies en alfabetrympies
Illustreerder: Alzette Prins
Lapa Uitgewers, 2023